Самостојниот синдикат на новинари и медиумски работници на 10 септември 2024 година во Тетово одржа работна средба на која со своите членови, но и со другите наши колеги ги отвори или се наврати на темите кои се константно присутни и кои се вистински предизвик за сите во оваа област во Полошкиот регион.

Од дискусиите на присутните на состанокот може да се изведе заклучок дека проблемите на новинарите, медиумските работници и целосно на медиумите не само што не се решаваат туку и се продлабочуваат, со општа забелешка дека ситуацијата станува алармантна и тоа во делот на најелементарно, а тоа е егзистирањето.

Слабите и потценувачки плати и хонорари, отсуството на договори за работа, извршувањето на повеќе обврски во исто време и технички непоткованост односно необезбедување на најосновните алатки за работа во медиумите се само дел од причините за намалениот интерес за ангажман на младите во медиумите што во моментов создава и недостаток на работна сила во важната сфера во Тетово.

Трендот на нарушување на основните работнички права кај колегите од Тетово е секојдневно и затоа многумина се подготвени, и ги прифаќаат и паднатите стандарди во делот на комуникација со локалните власти. Дел од нив предупредуваат дека без обезбеден превод не ќе бидат во можност да ја исполнуваат првата обврската на новинарите, а тоа е да бидат заштитници на јавниот интерес.

Средбата се реализираше во рамките на проектот „Работнички права за независно новинарство“, кој го спроведуваат ССНМ во партнерство со Институтот РЕСИС, а е финансиран од Европската Унија.