Самостојниот синдикат на новинари и медиумски работници со тим учествуваше во дводневната работа на Организацијата за безбедност и соработка во Европа (ОБСЕ) во Тирана од 17 до 19 мај 2026 година. Освен учество на панел-дискусиите кои опфатија повеќе теми кои главно се однесуваа на безбедноста на новинарите и медиумските работници во Југоисточна Европа, Синдикатот доби можност да ја претстави својата работа пред повеќе од 150 учесници од десетина земји.

На своевидниот медиумски саем, ССНМ ги презентираше своите активности и начинот на функционирање, што наиде на интерес кај колегите, кои го „окупираа“ нашиот штанд. Публикациите, анализите и материјалите што им беа достапни во печатена и дигитална форма според домаќините на настанот можат да бидат патоказ за голем дел од соседните медиумски организации.

Македонските медиуми во Тирана беа присутни во огромен број и учествуваа во голем дел од работилниците и секој на свој начин ги опишуваше актуелните состојби на нашата сцена.

Прелиминарната констатација од собирот на ОБСЕ во главниот град на Албанија е дека состојбата во македонските медиуми не ги следи медиумските трендови со акцент на вештачката интелигенција. Заклучокот од конференцијата насловена „Зајакнување на новинарството како јавно добро“ е дека безбедноста на новинарите и медиумските работници, но и социјалниот статус, се поле на кое сѐ уште многу треба да се работи и инвестира во овој дел од Европа.