На средба со колегите новинари и медиумски работници во Битола ССНМ одново констатира дека постои повеќекратен пад во стандардот и условите за работа за сите во оваа индустрија, и особено во локалните гласила. Самостојниот синдикат на новинари и медиумски работници на своевидната редовна консултација со членовите, но и сите заинтересирани за работата и обврските на еснафската организација ги изнесе своите активности и предлози кои треба да се заедничка идеја на сите ангажирани во македонските медиуми.

Тоа се обидите и понудата за потпишување на Колективни договори, предлогот до владата за делумното ослободување од придонеси за сите новинари и медиумски работници, како и идејата за создавање на фонд за содржини во медиумите, но и желбата за обединувањето како единствен начин за дејствување на луѓето од оваа сфера, за солидарноста меѓу новинарите, камерманите, монтажерите, тонците и сите други, која е неопходна во обидот да се имплементираат заедничките цели.

Низ двочасовниот разговор битолските новинари и медиумски работници обзнанија дека притисокот врз нив е константен, а го создаваат политички, бизнис, интересни групи, па и други формални или неформални состави и не стивнува, туку напротив станува се посилен. Во исто време локалните медиуми, и малкуте дописништва што останаа во Битола на поголемите медиуми се соочуваат со најелементарното, а тоа се условите за работа кои во голема мера се должат и на намалениот интерес на коминтентите за рекламирање.

Оваа средба се одржа во рамките на проектот „Зајакнување на капацитетите на новинарите за одбрана на нивните права“ поддржан од European Endowment for Democracy.