Основното јавно обвинителство во Скопје го одби барањето на Самостојниот синдикат на новинари и медиумски работници (ССНМ) и Здружението на новинари (ЗНМ), за кривично гонење против Миленко Неделковски за ширење на говор на омраза и загрозување на сигурноста на граѓаните.

ЗНМ и ССНМ,  го обжалија ова решение и се надеваат дека Вишото јавно обвинителство објективно ќе ја процени ситуацијата и ќе отвори предмет против Неделковски за упатени закани и ширење на омраза.

-Синдикатот ја поднесе кривичната пријава поради тоа што насилството, вербалното насилство кое владее во редакциите веќе одамна се прелеа во јавноста. Атмосферата на линч и пресметување со неистомислениците претставува сериозна опасност не само за новинарите туку и за сите граѓани, и се чини дека веке ситуацијата излегува од контрола. А кога ситуацијата излегува од контрола сите се жртви, и оние кои ја поттикнаа и оние кои ја спроведуваат и оние врз кои се спроведува насилството, но не сите се одговорни. Одговорни се оние кои тоа го иницираат и оние кои молчат и не го спречуваат злото. ССНМ нема да молчи, се обративме на надлежните во надеж дека ќе ја препознаат сериозноста на заканата. И нема да молчиме и понатаму. Станува збор за кривични дела по кои се постапува по службена должност па дури и кога институциите молчат – оторот кон злото е во документирањето и именувањето на работите со вистинско име, рече претседателката на ССНМ, Тамара Чаусидис.